You are here

أحاديث السيرة الذاتية

أحاديث فى السيرة الذاتية للدكتور/ على نويجى فى مختلف مراحل حياته

مرحلة النشأة

ولدت فى مدينة الإسكندرية فى 25 يوليه سنة 1925 فى عيادة واحد كان فى ذلك الوقت من مشاهير أطباء التوليد فى الإسكندرية اسمه محمود كامل فى منطقة محرم بك، ولم أًُسجل فى سجل المواليد إلا فى قرية النوايجة وسُجلت بتاريخ 15 يوليه 1925 ولا أعرف السبب فى إختلاف التسجيلين. لكن أنا قضيت طفولتى فى النوايجة وكانت والدتى معانا، هى إسكندرانية الهويّة لكن كانت تنتمى إلى عيلة حمزة بمدينة كفر الشيخ. وأنا نشأت فى أسرة كبيرة شوية، يعنى كان لى أعمام وزوجات أعمام ولى عمّات كثيرات.

مرحلة الدراسة الثانوية

أنا درست علمى.. وعايز أقولك.. أنا ماكنتش عايز أدخل كلية الطب دى خالص، أصلاً، وسبق المرحلة دى فترة غريبة شوية فاكرها "طشاش"، مرحلة غريبة... إن أنا "طفشت" مَرّة وأنا فى المدرسة الابتدائى فى دسوق، رُحْت كفر الشيخ، رُحْت ماشى حوالى 30 كيلومتر ورحت عند بيت جدى مأمور الجمارك اللى قلتلك عليه، كان هو مات ومراته الست أم عبده كانت موجوده، ودى كانت زى أمنا وجدتنا، رُحْت قعدت عندها شوية.. حوالى 5 شهور.
طبعا أبويا عرف، وخلاص الدنيا مااتقلبتش، وبعد شوية راحوا جابونى من هناك.

المرحلة الجامعية

أخدت البكالوريا ورُحت كلية الطب فى اسكندرية...

العلاقة مع ثورة يوليو

فى الأول احنا شَكّينا فيها... يعنى ضباط، ويُقال ان الملك هو اللى محرضهم... يعنى كان فيه كلام كتير حوالين الكلام ده...

بداية العمل كطبيب

أنا فى أثناء الدراسة كنت مغرم بعلم وظائف الأعضاء، وكان فيه راجل إيطالى كان بييجى فى الكلية يعمل تجارب على الكلاب وعلى القطط، يعنى يخدر كلب ويعمل تجارب بافلوف اللى كان بيعملها فى روسيا زمان... إن هو يخدر الكلب ويفتح بطنه ويطلع الجزء الأخير من المعدة بره، بحيث يدى الكلب – لما يفوق – أكل ياكله، وبعدين الأكل ينزل بره، لأنه واخد المعدة موصلها بالخارج.. فيصاب بما يسمى بالـ sham rage يعنى غضب فظيع جداً، لأنه بياكل ياكل ياكل ومايشبعش، لأن مافيش distension ، ما هو أحد عوامل الشبع إن المعدة تمتلئ، والمعدة لا تمتلئ رغم الأكل الكثير، فيصاب بـ sham rage ويتشنج تشنجات عضلية ويهبهب كتير...

Subscribe to RSS - أحاديث السيرة الذاتية